Voće i povrće mamama su oduvijek oduzimali vrijeme i živce jer neki mališani generacijama odbijaju čak i najslađe voće. Novija istraživanja pokazala su da je djetetovo odbijanje voća i povrća, evolucijske prirode jer su naši preci bili naučeni da se preplaše nad svakom novom zelenom ili “biljkastom” namirnicom zbog potencijalnog trovanja.

Nutkanje, aviončići, kašičice za mamu, tatu, baku i slične metode ponekad ipak ne urode plodom, a dijete ne unese preporučene dnevne količine voća i povrća, što iznosi nekih pet serviranja bilo sirovog ili kuvanog.

Naravno da ni zdrava odrasla osoba ponekad ne unosi tolike količine voća i povrća, ali za dijete u razvoju, važno je ne izostavljati elementarne namirnice bogate potrebnim nutrijentima.

Iako je sakrivanje i podvaljivanje hrane česta tema rasprava mama i tata na roditeljskim forumima, djetetovo zdrastveno stanje ponekad mora biti važnije od moralnih stavova  pa mu povremeno ubacivanje namirnica koje ne voli u jela koja voli, nikako ne može naškoditi.

Iskoristite djetetovu omiljenu namirnicu

Djeca u prvim godinama života obično razvijaju simpatije prema određenoj vrsti hrane, a najčešće je riječ o utješnim obrocima odnosno onome što se servira u bočici, omiljenoj šoljici ili tanjiru. Tako nije rijetkost da su mliječne kašice uvijek dobrodošle ako se pita vaš mališan, a one vam mogu vrlo dobro poslužiti za “podvaljivanje” povrća ili voća.

Ako dijete voli mliječnu kašicu blijede boje, voćke kao što su jabuka, kruška ili banana, neće se primjetiti ako ih dobro narendate i umiješate u homogenu smjesu zajedno s kašom. Ako je kašica nešto tamnije boje, tada u nju možete smiksati i pomoranžu, dinju ili breskvu, ali u manjim količinama jer će se kiselu voćku dijete lakše primjetiti.

U ovsene i rižine kašice koje pravite s vodom, dodajte skuvani pire od krompira, celera ili korijena peršuna.

Ako dijete voli pudinge jogurte i sladolede, u puding mu ukuvajte bananu ili ako je riječ o pudingu od jagode, dodajte neko crveno bobičasto voće koje ste prethodno smiksali. U običan tečni jogurt umiješajte bilo koje smiksano voće i djetetu objasnite da je riječ o voćnom jogurtu. Ako je potrebno, smjesu zaista i prelijte u čašicu voćnog jogurta koje dijete inače jede.

Sladoled neće odbiti, a vi se poslužite ili mliječnom opcijom ( zamrznuti jogurt s miksanim voćem) ili običnom varijantom ( zaleđena voćna kaša).

Voćni smoothie ili mliječni frape djeca uglavnom vole jer je napitak osvježavajuć, a uvijek ga možete i zasladiti medom.

Izmislite novi sos za tjesteninu

Pohovana jela nikako nisu preporučljiva za čestu konzumaciju, ali upravo je pohovano i prženo povrće najslađa varijanta koju djeca teško odbijaju. Pohovane tikvice, patlidžani pa čak i prokelj pržen u gustom sosu za palačinke, čine konkretan obrok koji se, u umjerenim dozama, ipak može ponuditi izbirljivijoj djeci.

Prilično uspješna metoda su varijacije na temu omiljenog sosa za tjesteninu, rižu ili njoke. Sos bolonjez ili bilo koji sličan umak dobra je podloga za ubacivanje sitno sjeckanog povrća kao što su oguljene tikvice, paprike, šargarepe, krompiri, celer, korijen peršuna ili oguljeni patlidžan. Ako ih dovoljno sitno nascjeckate, povrće će se stopiti s sosom i dijete neće osjetiti razliku.

Ako vaše dijete preferira makar jednu vrstu guste supe, u nju uvijek možete umiksati barem još dvije vrste povrća slične boje koje neće primijetiti.

Ako ni jedan od ovih načina ne djeluje kod vašeg mališana, uvijek vam ostaje dobro provjerena i zdrava metoda voćnih i povrtnih cijeđenih sokova razrijeđenih s vodom i zaslađenih s medom. Servirani u omiljenoj bočici ili šoljici, djetetu će poslužiti kao utjeha i okrijepljenje, a obezbijedeće mu, makar dio, preporučene dnevne doze.

Izvor: Klinfo.hr