Doručak ne mora da bude iz pekare. Probudite se malo ranije i pripremite ukusnu gozbu za vaš stomak. Ili možda neke od ovih jela pripremite za večeru.

Palačinke od krompira

Sastojci:

• 1 kg krompira;
• 200 g brašna;
• 200 ml mlijeka;
• 100 ml mineralne vode;
• 2 jaja;
• 250 g šunke;
• 2 čena bijelog luka;
• so;
• biber;
• peršun;
• ulje;
• 1 kašika mješavine suvih začina.

Priprema: Krompir oljuštite, narendajte i ocijedite. Dodajte brašno, mlijeko i šunku koju ste isjeckali. U to umiješajte razmućena jaja, malo soli, bibera, peršun, izgnječen bijeli luk i suvi začin. Na kraju dodajte mineralnu vodu. U tiganju zagrijejte malo ulja i ravnomjerno u obliku palačinke rasporedite smjesu. Palačinke pecite sa obje strana dok ne dobiju zlatnožutu boju.

Omlet sa paradajzom i pršutom

Sastojci:

• 1-2 kašike maslinovog ulja;
• 20 g luka isječenog na kriške;
• 20 g sušenog paradajza u maslinovom ulju;
• 20 g pršuta;
• 2 jaja;
• 1/2 kašičice mješavine suvog začina;
• 1 kašičica isjeckanog svežeg bosiljka.

Priprema: U većem tiganju na maslinovom ulju kratko propržite luk, dodajte isječeni sušeni paradajz i pršut i pecite na laganoj vatri oko tri minuta. Jaja lagano istucite, dodajte začin i prelijte po luku, paradajzu i pršutu. Pržite još 2-3 minute. Kajganu pospite isjeckanim bosiljkom i poslužite toplu.

Slatke mrvice

Sastojci:

• 2 jaja;
• 3 kašičice šećera;
• 150 ml mlijeka;
• malo soli;
• 100 g brašna;
• 1, 5 dl ulja.

Priprema: U veću posudu sipajte brašno i razbijte jaja. Dodajte šećer i malo soli. Smjesu miješajte dok ne razbijete sve grudvice. U dobro umiješanu smjesu sipajte malo mlijeka, promiješajte, dodajte ostatak mlijeka i miješajte dok ne dobijete homogenu masu. Pripremljenu smjesu pržite u vrelom ulju. Kada masa počne da se steže, počnite da miješate. Pržite uz neprestano miješanje razbijajajući veće komade, sve dok ne dobijete mrvice. Mrvice pospite šećerom ili prelijte džemom.

Zapečena palenta sa sirom i paradajz sosom

Sastojci:

• 2 šolje palente;
• 1 kašičica putera;
• 6 šolja vode;
• 1 crni luk;
• 3 čena bijelog luka;
• 2-3 šolje paradajz sosa;
• biber;
• so;
• 2 šolje rendanog kačkavalja;
• maslinovo ulje.

Priprema: Stavite vodu da proključa i sipajte malo soli, puter i palentu. Kuvajte dok se palenta ne zgusne. Sipajte u pleh namazan puterom da bude centimetar debljine i ostavite da se ohladi. Za to vrijeme na maslinovom ulju izdinstajte luk da blago porumeni i dodajte paradajz sos, pa krčkajte oko pet minuta. Dodajte biber i so. Ohlađenu palentu režite na kocke, ređajte u predhodno namašćenu tepsiju. Prelijte pola paradajz sosa i pospite sa pola količine sira. Opet rjeđajte kocke palente i pospite ostatak paradajz sosa i sira i stavite otkriveno u rerni da se peče. Pecite 25-30 minuta, da se uhvati rumena korica i sir istopi.

Pita sa povrćem i sirom

Sastojci:

Za tijesto:

• 20 g svježeg kvasca,
• 150 ml tople vode;
• 400 g polubijelog brašna;
• 2 kašike maslinovog ulja;
• so.

Za nadjev:

• 2 kašike maslinovog ulja;
• 300 g paradajza;
• 100 g zelene paprike;
• 6 listova svježeg bosiljka;
• 5 crnih maslina;
• 1 kašika kapra;
• 1 kašičica mješavine suvih začina;
• 40 g tvrdog kozjeg sira.

Priprema: Kvasac razmutite i ostavite da ‘’nadođe’’ oko 10 minuta. Preostalom brašnu dodajte so, ulje, dignuti kvasac i uz dolivanje vode umijesite mekano glatko tijesto. Ostavite da stoji pokriveno na toplom mjestu dok se ne udvostruči. Na kašici ulja prodinstajte isjeckani paradajz, papriku i dodajte bosiljak. Tijesto premijesite i oblikujte valjak. Tepsiju prekrijte papirom za pečenje, tijesto složite u obliku vijenca i rukama ga raširite u tanki sloj. Po tijestu rasporedite pripremljeni paradajz sa paprikom, pospite maslinama, kaprom i suvim začinom, poprskajte uljem i na kraju pospite narendanim sirom. Pecite u rerni zagrijejanoj na 220 stepeni 15-20 minuta.

Izvor: Blis.rs